Tindur í Tindfjöllum stendur ögrandi upp úr Tindfjöllum, fjallarana er gengur suðaustur úr Tindfjallajökli, en af Tindinum er frábært útsýni yfir Þórsmörk og Fljótshlíð og upp á jöklana tvo við suðurströndina, Eyjafjallajökul og Mýrdalsjökul.

Fjarlægðin gerir fjöllin blá. Bláfell er útvörður Kjalar í suðri. Hæð Bláfells, sem er móbergsstapi en svo nefnast fjöll sem orðið hafa til við gos undir jökli, er 1204 metrar. Bláfell gefur því vel til kynna stöðu jökla á myndunartíma þess. Bláfell er hæsta fjall utan jökla á suðvesturhorni landsins.

Súlur eru bæjarfjall Akureyrar. Í raun eru Súlur tveir fjallstindar. Nær Akureyri rís Ytri-súla en litlu sunnar er Syðri-súla sem er hærri, 1213 metrar. Súlur eru að mestu gerðar úr ljósu líparíti sem á uppruna í Öxnadalseldstöðinni, er var virk fyrir 8-9 milljónum ára.

Í Kjalnesingasögu er sagt frá írskri ekkju sem hét Esja. Hún var vellauðug og bjó að Esjubergi eftir lát Örlygs gamla sem þar byggði fyrstur bú. Kunnugir draga þessa söguskýringu í efa eins og raunar fleira í þessari annars ágætu lygasögu. Tilurð nafnsins er því enn á huldu.

Hið formfagra fjall Keilir varð til við gos á sprungu undir jökli á ísöld. Upphaflega hefur Keilir því verið hluti móbergshryggjar sem eyddist með árunum af völdum veðrunar og huldist nýrri hraunum þannig að eftir stendur fjallið Keilir (378 metrar), einkennisfjall Reykjanesskagans.

Fyrir daga bílsins var Kjölur eða Kjalvegur fjölfarnasta leið milli Norður- og Suðurlands. Kjölur nefnist hæsta svæðið (spildan) milli Langjökuls og Hofsjökuls þar sem vatnaskil eru (eins og kjölur báts (keel) á hvolfi). Þar sem Kjölur er í raun skarð á milli tveggja stórra jökla verða þar gjarnan skyndilegar og stundum ófyrirséðar veðurbreytingar.

Á Suðurlandi hófst árið 1783 með miklum jarðskjálftum svo 90 sveitabæir á Suður- og Suðausturlandi lögðust í rúst. Í júní sama ár hófust Skaftáreldar, eitt mesta hamfaraskeið Íslandssögunnar, með gríðarlegu eldgosi á 25 km langri gossprungu kenndri við móbergsfjallið Laka.