Botnsá rennur úr öðru dýpsta vatni landsins, Hvalvatni (160 m), í Hvalfjörð. Í stórfenglegt gljúfur Botnsár fellur hæsti foss landsins, Glymur, um 198 metra hár. Margir hafa furðað sig á örnefnum á þessum slóðum en skemmtileg þjóðsaga er Rauðhöfði nefnist segir frá tilurð þeirra.

Í stuttu máli segir sagan að álfkona hafi lagt svo á mann er hafði svikið hana í tryggðum að hann breyttist í illhveli. Illhvelið, sem ætið var kallað Rauðhöfði, varð mörgum sjófaranda á Faxaflóa að fjörtjóni og meðal annarra, sonum prestsins á Saurbæ á Hvalfjarðarströnd. Presturinn, sem var blindur, var forn í skapi og vissi jafnlangt nefi sínu. Einhverju sinni tók hann sér staf í hönd og staulast í fylgd dóttur sinnar niður í fjöru og leggur stafinn í flæðarmálið. Stuttu síðar kom Rauðhöfði syndandi inn fjörðinn og fylgdi presti er hann gekk inn að ósum Botnsár og reyndar alla leið upp í Hvalvatn. Á leið hvalsins upp fossinn í gljúfrinu barðist hann svo mikið að glumdi í líkt og um jarðskjálfta væri að ræða og er nafn fossins dregið af því. Þegar í Hvalvatn kom sprakk Rauðhöfði af áreynslu en hvalbein sem þar hafa fundist þykja sögunni til sannindamerkis.