Baldur

Baldur er sonur Óðins og Friggjar.  Hann er kvæntur Nönnu Nepsdóttur og á með henni soninn Forseta.  Hann býr á Breiðabliki, hinum fegursta stað sem aldrei má óhreinkast.  Hann á skipið Hringhorni. Baldur er svo góður og fagur að það lýsir af honum.  Hann er vitrastur ása en þó halda dómar hans ekki.  Engin vopn bíta Baldur og enginn háski hendir hann, eins og Snorri segir í Gylfaginningu:

var það gert að beiða griða Baldri fyrir allskonar háska. Og Frigg tók svardaga til þess að eira skyldu Baldri eldur og vatn, járn og allskonar málmur, steinar, jörðin, viðirnir, sóttirnar, dýrin, fuglarnir, eitur, ormar.

Goðin gerðu sér að leik að bera á hann vopn og fór það illa að lokum:

Dauði Baldurs

Baldur dreymir fyrir dauða sínum og segir ásum.  Þeir ákveða að biðja honum griða og Frigg fer vítt um heiminn og tekur eiða af vatni, eldi, málmum, steinum, jörð, sjúkdómum, viðum, hvers kyns skepnum og eitri. Ekkert á að geta skaðað Baldur. Eftir að allt og allir hafa lofað að hlífa Baldri gera æsir sér það til skemmtunar á þingum að bera vopn á hann.  Þeir ýmist skjóta að honum, höggva til hans eða grýta.  En Baldur bíður engan skaða af. Loka líkar þetta illa og gengur á fund Friggjar dulbúinn sem kona. Hann spyr hvort ekkert fái skaðað Baldur. Frigg segir honum að mistilteinn vaxi skammt frá Valhöll, hann einn hafi ekki svarið eiðinn.  Þegar Loki hefur fengið þessar upplýsingar fer hann og finnur mistilteininn, slítur hann upp og fer með á þing ásanna.

Höður stendur afsíðis á þinginu því hann getur ekki tekið þátt í leiknum. Hann er bæði blindur og vopnlaus.  Loki gengur til Haðar og fær hann til að skjóta mistilteininum að Baldri. Teinninn flýgur gegnum Baldur sem fellur jafnskjótt dauður til jarðar.

Æsir eru harmi slegnir, en geta ekki hefnt Baldurs því þing þeirra er of mikill griðastaður. Til að ná fram hefndum getur Óðinn soninn Vála, sem drepur Höð og brennir á báli, aðeins einnar nætur gamall.

Þegar goðin mega loks mæla fyrir sorg er það ráð tekið að reyna að endurheimta Baldur.  Hermóður, sonur Óðins, er sendur til Heljar þar sem hann biður Hel að láta Baldur lausan.  Hún neitar að sleppa honum nema allir hlutir, dauðir og lifandi, gráti hann. Nú fara sendimenn ása um allan heim til að fá Baldur grátinn úr Helju.  Allir hlutir gráta hann og allar lifandi verur.  En á heimleið finna sendiboðarnir gýgina Þökk í helli sínum.  Hún neitar að gráta, enda fer þar Loki í dulbúningi sem kemur þannig í veg fyrir að Baldur snúi aftur.

(Heimildir: Völuspá).

---