66°Norður hefur undanfarið verið á sýningum víðsvegar um heiminn til að kynna nýju vetrarlínu fyrirtækisins. Stærstu sýningarnar sem fyrirtækið tók þátt í að þessu sinni voru OutDoor Retailer sem er stærsta útivistarsýning Bandaríkjanna og svo ISPO sem haldin er í München og er stærsta útivistarsýning Evrópu. Viðbrögð kaupenda og blaðamanna við nýju línunni voru frábærar og hefur fyrirtækinu borist fjöldinn allur af fyrirspurnum um merkið og stöðu þess erlendis. Nýja vetrarlínan hittir í mark hjá mjög breiðum hópi fólks þar sem hún samanstendur bæði af tæknilegum útivistarfatnaði eins og Vatnajökul línunni og götufatnaði úr hágæða efnum sem gengur undir nafninu „Icelandic Living”. Að sögn Halldórs Gunnars Eyjólfssonar, forstjóra 66°Norður, hefur fyrirtækið í kjölfar sýninganna hafið samstarf um söludreifingu á 66°Norður fatnaði í 6 nýjum löndum sem fyrirtækið hefur hingað til ekki selt vörur sínar til. Fljótlega verður því hægt að nálgast vörur fyrirtækisins í 19 löndum víðsvegar um heiminn. „Það er alveg ljóst af þeim viðbrögðum sem við fengum nú, að fyrirtækið sé á réttri leið þar sem viðtökurnar hafa verið mun betri í ár en fyrri ár þrátt fyrir alheimskreppu“. Sagði Halldór ánægður með árangurinn.

Áhugi blaða- og fréttamanna á vörumerkinu var mikill eins og áður sagði og birtust til að mynda tvær fréttir um merkið í OR Daily þar sem annars vegar var talað um það að Langjökull Primaloft jakkinn væri „showstopper“ og hins vegnar fjallað um langa sögu fyrirtækisins og rætur þess í framleiðslu sjó- og vinnufatnaðar.

Um 66°Norður

Sjóklæðagerðin - 66°Norður er eitt elsta framleiðslufyrirtæki landsins, stofnað árið 1926, og hefur um áratuga skeið verið leiðandi í framleiðslu á sjó- og vinnufatnaði. Undanfarinn áratug hefur fyrirtækið vaxið hratt með aukinni framleiðslu og sölu á fjölbreyttum fatnaði til útivistar og fengið margvísleg verðlaun fyrir hönnun sína og markaðsstarf síðastliðin ár.

Í dag starfa rúmlega 300 manns hjá fyrirtækinu og rekur það 10 verslanir hér á landi undir vörumerkjum 66°Norður og Rammagerðarinnar. Heimasíða fyrirtækisins er: www.66north.is