Tilgangur miðlagsins er að mynda loftmikið lag sem veitir góða einangrun. Miðlagið þarf einnig að taka við raka frá innsta laginu og annað hvort veita honum í burtu eða draga hann í sig án þess þó að missa einangrunargildi sitt. Þetta lag ætti að vera hæfilega vítt en falla vel að hálsi og úlnliðum og halda þar hita því þar er mikið blóðstreymi og hætta á hitatapi. Algengasta miðlagið er flíspeysa. Á göngu getur þú ofhitnað, jafnvel þó það sé mjög kalt í veðri og er þá hægt að fjarlægja þetta lag. Ef þú stoppar til að hvíla þig eða þegar komið er í náttstað skaltu fara aftur í peysuna áður en það slær að þér.